باهي توة عودة على حكاية مانيش مسامح : نحب للمرّة الألف نقول اللّي مانيش مسامح حملة شبابية مستقلّة ماهيش مربوطة بحتى حزب و ما عندها حتى تمويلات من حتى حد . مانيش مسامح بنات وولاد رجال و نساء محلاهم لمتهم رغبتهم في التصدّي للفساد و لقانون مصالحة الفسّاد . مانيش مسامح ماهيش حزب و ماهيش جمعية و مافيهاش انخراطات , أي مواطن او مواطنة رافضة انّو قانون الفسّاد يتعدّى ينجّم يجي يتحرّك مع مانيش مسامح . انّو أحزاب و لا أشخاص ما تعجبكمش تلتحق بالتحركات ماهيش ذريعة باش ما تاقفوش ضدّ القانون هذا و توّليو تهاجمو في الحملة . اذا انت مقتنع بانّو القانون ما لازموش يتعدّى لازمك تدافع عالفكرة هاذي مش تقعد تلوّج في سبّة باش ما تتحرّكش . شكون جا عيّط ما يهمّش برشة اللّي يهمّ هو انّو القانون ما يتعدّاش . ماكش مجبور لا باش تحكي لا باش تسلّم لا باش تتصوّر مع ناس انت ماكش مقتنع بتوّجهاتهم . اللّي يهم هو لبّ الموضوع .